Mark 8

Jisas a'amu ‘foua tausen’ (4000) sohwamo wopayo umentisofoho.

(Matɨyu 15:32-35)

1Nom'ne sɨkuno somo a'amu pi'nɨngo engo apa'no Jisas nohumentanjopo uhu'mokumentohofofoho. Hofɨko nohumantɨfi hwe moya'mi wosopayo moi'wo imo'nɨngkahonɨngki Jisas kakoe inomokomoyo sohwamne'no joho ulonto, ulɨmento, 2Ngko olo hwe moya'mi lomne'no hitoho ntokwoho. Sɨkuno hufa'u sɨhune ngko'nji humantohofofoho. Hofɨko wosopayo anefoho. 3Mijoho'nohino hofɨkoe ango pone'no lɨhwatɨmeso hofɨko honɨngkanopo tɨmo sɨkuno'no ulohofontɨfeho. A'amu fiso ikanopo nta'ni pmmalofofoho. 4Ose ulahonɨngki kakoe inonokomayo sohwa ulɨmentohofi, Olopo a'amu mohumunyoponoho. Wosopayo hwe moya'mi somne'no ntɨ'mta'ni tɨpemanehwono. Awonoho. 5Ose ulahonɨngkofi Jisas ulohonɨmento, Sekwo wopayo alale weho. Ose ulahonɨngki ulɨmentohofi, Wopayo aho hopi'nono nom'ne mta'ni hufa'u weho.

6Ose ulahonɨngkofi Jisas hwe moya'mi somo ulɨmento, Sekwo hwaho lopo fosyohumamno. Ose ulonto, kako wopayo aho fehohnjo hopi'nono fehohnta'ni hufa'uyoso nomanto Anɨtumo isamoyoka ulonto wopayoso kutɨkujo lohofonto, kakoe inomokomoyo sohwamo uyahonɨngki hofɨko a'amumo hu'muyɨmentohofofoho. 7Inanɨku we'e tɨpema'mentohofoso Jisas nomanto Anɨtumo isamoyoka ulonto inomokomoyo sohwamo ulɨmento, Olo'nji a'amumo fohu'muyɨmno. 8Hofɨko wopayo nonontɨfi sɨmeho uhnnɨngkahonɨngki wopayo nɨlɨfeeo'mentohofoso inomokomoyo sohwa sohwo ho'yo aho fehohnjo hopi'nono nom'ne nta'ni hufa'uyo somo mehu'memeehumentohofofoho. 9A'amu hiso we'e humamentohofo'maho. A'amufoua tausen (4000) humamentohofofoho. 10Jisas a'amu homo somo wopayo moi'wo uyonto hofɨkoe angopo ne'no lɨhwatɨmentisofoho. Kako kakoe inomokomoyo sohwanji yofayokinopo kotasontɨfi hwaho Ntalɨmanuta'no wako'mentohofofoho.

A'amu Falisi sohwa Jisasɨmo yamofo ulohofantɨfi imentohofofoho.

(Matɨyu 16:1-4; Luk 12:54-56)

11Osopo a'amu Falisi sohwa Jisasɨmo u'mantɨfi kakimo yamofo ulohofone'entɨfi yoka hnnoma'mentohofofoho. Kɨko yo'mayo wonyoangkafo a'amu miyɨwo'nɨngkiyohofoso fonetɨhwaho. Ose uhwonɨngkuhwasi Anɨtu kɨko'nji humaho wolano. Ose lontɨfi huno syafɨhu'mentohofi, Olo hwe lohwo Anɨtuye Hwe Ne hwolɨkeno. 12Ose ulahonɨngkofi Jisas sɨmeho tango uyahonɨngki sɨmano esyamo lohofonto, ulɨmento, Sekwo yo'mayo wonyoangkafo a'amu miyɨwo'nɨngkiyohofoso peho'no uhwonantɨfe'ne lohofo. Hungkuno nehopi waselɨmo. A'amu olo hwaho lopo olohonta humalofoso hofɨko oso yo'mayo hiso muhwonɨfitnnehofo. Nɨhu'no awonoho. 13Ose ulonto oso a'amu somo ulɨko'manto Jisasɨ'nji kakoe inomokomoyo sohwa'nji hofɨko yofayokinopo apa'no kotasontɨfi asomo wako'mentohofofoho.

A'amu Falisi sohwanji hwe engo Heloutɨ'nji hofɨkoe wosopayo engo imo'nyo'ne hungkunofoho.

(Matɨyu 16:5-12)

14Nowakentɨfi inomokomoyo sohwa wopayo'no inɨngo mofontɨfi momasofoho. Wopayo kenga'nohini yofayokinomo wo'nnyofoho. 15Nowekontanɨngkofi Jisas sɨmano pento pahnnɨmo hungkuno ulɨmento, Upa'nɨmo. Sekwo a'amu Falisi sohwanji Heloutɨ'nji hofɨkoe yahino somne'no i'waho fiyɨmno. 16Inomokomoyo sohwa nupa'nontɨfi hnnɨmentohofi, Nakwo wopayo inɨngo mofɨhwone so'no hungkuno nalohoho. 17Ose hnnɨngkahonɨngkofi olo hiloso Jisas huno uyahonɨngki hofɨkimo ulohonɨmento, Wopayo umofonyo iyo so'no peho'no hnnalokwofo. Sekwo huno'maseyotaho. Sekwo huno mosyafɨsiyo'njo liyohofo. 18Sekwo tɨmo hi'njo hwasoho. Muhwonalokuliyohofo. Sekwo haloho hi'njo hwasoho. Mupo'nalokuliyohofo. Sekwo inɨngo loseyalofoho. 19Ngko wopayo aho fehohnjo hopi'nono kutɨkujo lohofonji a'amufaif tausen (5000) sohwamo umaleso oso wopayo nɨlɨfeeo'malofoso sekwo ho'yo alale hu'memeehumalofo. Inomokomoyo sohwa ulɨmentohofi, Aho hopi'nono sɨfe mta'ni hufa'uyoho. 20Ose ulahonɨngkofi Jisas ulɨmento, Nom'ne sohonta ngko wopayo aho fehohnjo hapi'nono nom'ne mta'ni hufa'u kutɨkujo lohofonji a'amufoua tausen (4000) sohwamo umaleso oso wosopayo nɨlɨfeeo'malofoso sekwo ho'yo alale hu'memeehumalofo. Inomokomoyo sohwa ulɨmentohofi, Aho fehohnjo hopi'nono nom'ne mta'ni hufa'uyoho. 21Ose ulahonɨngkofi Jisas ulɨmento, Oseso sekwo nje yokumpohn'nyo so'no huno maseyoholiyohoho. Wosopayo so'no huno pi'nɨngo peho'no syofɨsyalokwofo. Ose ulɨmentisofoho.

Hwe Mpetɨsaitanta'ango sohwoe tɨmomo Jisas wopɨngo umokumentisofoho.

22Jisas kakoe inomokomoyo sohwanji ango Mpetɨsaita i'mofopahonɨngkofi a'amuso hwe tɨmpi'nyo sohumo ipemotapontɨfi Jisasɨmo jomo ulɨmentohofi, Olo hwe lohumo kɨko aho tɨmopo fɨkisyusyo. 23Oseso Jisas kako hwe tɨpi'nyo sohwoe aho nomanto angkuhwafopo mempo hohnta'ni ipemotoswaponto kakoe tɨmomo memijo uyatɨ'mofonto aho kisusyonto ulɨmento, Kɨko yo'mayoso nto lɨhwonɨngkino muhwonɨngkoho liyohino. 24Ose ulahonɨngki hwe sohwo fe'nɨhwononto ulɨmento, Ngko a'amumo uhwonɨngkohono. Hofɨko iyo hopa pohotowalokwofo. 25Ose ulahonɨngki Jisas hwe huhwo sohwoe tɨmomo aho apa'no kisusyahonɨngki kako tɨmo yokumpohn'nyo uhwononto tɨmo wopɨngo imo'nɨmentisoso, yo'mayo ito'no uhwonɨmentisofoho. 26Ito'no uhwonɨngkahonɨngki Jisas ulɨmento, Jɨje angopono fɨwano. Olo angkuhwafo lopono asomo nopohotoho. Ose ulɨmentisofoho.

Pita Jisasɨmo ulɨmento, Kɨko Kɨlais kiyoho.

(Matɨyu 16:13-20; Luk 9:18-21)

27Jisas kakoe inomokomoyo sohwanji hwaho Ngkalili ulɨko'mantɨfi hwaho Sisaliya Filipai nowentɨfi Jisas hofɨkimo ulohonɨmento, A'amuso ngkine'no pehofo mjolɨmɨwalokwofo. 28Ose ulahonɨngki hofɨko ulɨmentohofi, A'amu fehohnjoso kikine'no ole lalokwofi, Joun A'amumo Mijo Kiyoma'mojo sohwolɨkeno. A'amu nom'ne fehohnjoso ole lalokwofi, Ilaijakulɨkeno. Nom'nehwa a'amumo Anɨtu hungkuno uyahonɨngki lɨmojo sohwolɨkeno. Kikine'no ose mjokilɨmɨwalokwofo. 29Ose ulahonɨngkofi Jisas ulohonɨmento, Sekwo sohwasi ngkine'no pehofo ntɨwo'nɨngkohofɨhwasilo. Ose ulahonɨngki Pita ulɨmento, Kɨko Kɨlais kiyoho. Anɨtu nakwo a'amu Jutasɨ'nɨmo nefo'mayo'ne kuhwotɨmentiso hwosoho. 30Ose ulahonɨngki Jisas ulɨmento, Oso hiso ntohinoso a'amumo nulohotoho.

Jisas kakoe inomokomoyo sohwamo kako poyo imo'none so'no ulɨmentisofoho.

(Matɨyu 16:21-28; Luk 9:22-27)

31Jisas kakoe inomokomoyo sohwamo lutɨhwoma'mento, A'amufe Hwomu sohwo'ni ngko tohino engo noma'mne hwo'nyoho. A'amu Jutafe hwe engo sohwanji a'amu tajo ango syoho'njo sohwanji Jutafe honɨngkano hungkuno lutɨhwawo'nɨngkohofo sohwanji hofɨko ngkine'no nakwolaho ntɨkuji hohujo ikenjanɨmofɨkuji nofonjanɨhufitnnefoho. Nofonjanisyɨkuji sɨkuno hufa'u sɨhune memjanɨmofɨhwoso'no ngko apa'no songo wolɨka'monnoho. 32Ose ulonto olo hungkuno yoloho neso ulɨmentisofoho. Seten kako Pitamo huno ufohotofahonɨngki Pita kako Jisasɨmo we'enepi ipemotawento yoka uloma'mento, Jisas, oso hungkunoso wopɨngo'maho. Oso hunoso nosyafɨsyohotoho. 33Ose ulahonɨngki Jisas ikinjamo lohofonto kakoe inomokomoyo nom'ne sohwamo uhwononto Pitamo yoka ole ulɨmento, Pita, jɨje hungkunoso ngkilaho. Anɨtuye'maho. O'o, Setenɨye hungkunofoho. Kɨko Seten sohwosi i'waho ntohofo. Kɨko nje hohujo lo'mo filoho'nawofo.

34Ose ulonto kako nom'ne hwe moya'mi so'nji inomokomoyo sohwanjimo joho ulonto ulɨmento, U, a'amu fisoku ngkimo wonnɨngkopano lɨfijo'manji sekwo sekwoe semo'nɨwo'nɨngkiso so'nji sekwoe yofe so'nji monje yahinɨngkuji sekwo nje yofe'no poyo pe'nyo so'no iyoho miyo'njo ifijoso ngkimo mofone sopo tɨfi nnɨngkapmno. 35A'amu fihwo kakoe songo humayoso yokumpohn'nyo womokosyohumamo lososo, Kakoe songo ne'no humayoso wopɨwahu'mtonoho. Oso'no a'amu fihwo ngko'nji nje hungkuno'ntnne'no huno uyahonɨngkuhwosi kakoe humayoso pɨwasyososo hwangku kakoe humayoso wotɨpema'montonoho. 36A'amu fihwo kako Anɨtumne'no hohujo ikinjaofɨhwosi kako olo hwaho loponjo ho'yango hamniyoho yo'mayoso engo hu'meesyontoso sohwo kako tɨkanomo weso'manji oso ho'yango yo'mayoso pipi ufo'maneto. Awonoho. 37I, kakoe songo humayoso ne ane'manji kako pipi yone'elo. Awonoho. 38A'amu fihwo olo hwaho lopo a'amu honɨngkano wonyo'njo humaso sohwo kako nje hungkuno so'nji ngko'ntnne'no hohujo ikinjanɨmofoso sohwo ngko oso huhwo sohumne'no tɨfi no'mo hohujo ikinjɨmo'mnefoho. Ou, osohonta ngko nje Mpohwoe yokumpohn'nyo so'nji a'amu ahwomomjo wopɨngo'nohino sohwafe yokumpohn'nyo'nji olo hwaho lopo asomo pmme sohonta a'amu ngkine'no hohujo ikinjanɨmofoso sohune'no ngko hohujo ukinjɨmo'monnoho.